Yuunivarsitii Hawaasaatti riqichi jigee barattoota qormaata kutaa 12ffaa qoramuuf garasitti imalan irraan miidhaa dhaqqabsiise. – OMN

Yuunivarsitii Hawaasaatti riqichi jigee barattoota qormaata kutaa 12ffaa qoramuuf garasitti imalan irraan miidhaa dhaqqabsiise.

Riqichi jige mooraa guddaa Yunivarsitichaa kan mooraa Techno jedhamuun beekamuun wal-quunnamsiisu yoo tahu, har’a ganama jiguun barattoota qormaata fudhachuuf walitti qabaman hedduurraan miidhaa qaqqabsiisuutu himame.

Balaa mudateen barataan tokko lubbuu isaa dhabuu fi barattoonni biroon madaa’uu biiroon bulchiinsaa fi nageenyaa naannoo Sidaamaa beeksiseera.

Biirichi akka jedhetti, balaa kanaan barataan tokko lubbuun darbee, lama immoo garmalee miidhaman.

Namoonni ijaan argan immoo barattoota 60 caalaatu madaa’ee jedhan. 

Barattoonni miidhaa garaagaraaf saaxilaman wal’aansaaf gara Hospitaala Rifaraalaa Hawaasaatti guuramaa turuus himaniiru.

Balaa mudateen walqabatee barattoonnii fi maatiin barattootaa rifaatuu jabaa keessa seenuun muddamni uumamuu odeeffanneerra.

Barattoonni qormaataaf gara yuunivarsiitii gaaf dhaqan bilbila harkaa akka qabatanii dhufan waan dhorkamaniif maatiin haala ijoolleen isaanii keessa jiran odeeffannoo dhabuun gara yuunivarsiitichaatti yaa’aa jiru jedhameera.