Qondaalonni ABO mana hidhaa Buraayyuutti argaman, dararaa ulfaataa keessa jiraachuutu himame. – OMN

Qondaalonni ABO mana hidhaa Buraayyuutti argaman, dararaa ulfaataa keessa jiraachuutu himame.

Addattuu Qondaalota ABO alaanoo keessaa mana hidhichaatti kan argaman namoonni sadii jechuunis Obbo Kennasaa Ayyaanaa, Obbo Gadaa Gabbisaa fi Obbo Mikaa’el Booran dhibee fayyaa cimaaf saaxilamuun, waldhaansa fayyaa dhabanii rakkoo keessa jiraachuutu himame.

Obbo Kennasaa Ayyaanaa tajaajila feeyizooteeraappii hordofaa jiraachuun isaanii yoo himamu, hospitaala ciibsamanii akka yaalamaniif ogeeyyiin fayyaa ajajanis koomishiniin poolisii Oromiyaa hayyama dhowwateera jedhan maddeen.

Dhibeen Obbo Kennasaa mudate yerootii gara yerootti hammaachaa dhufuusaa waliin walqabatee, yeroo ammaa kana socho’uu akka hin dandeenyeefi wiilcheriitiin akka socho’an ta’uutu ibsame.

Dabalataanis Obbo Gadaa Gabbisaa fi Obbo Mikaa’el Booran haala hedduu yaachisaa keessatti argamu jedhame.

Manneen murtii sadarkaa federaalaa fi naannoo yeroo adda addaatti qondaalota kana biliisaan akka hiikaman ajajus, poolisiin utuu hin hiikin waggoota sadiif hidhee jira.