Manni Marii Amantiilee Oromoo Idil Addunyaa ajjeechaa sukkanneessaa ummata Oromoo aanaa Amuruu magaalaa Agamsaa fi naannawa isheerratti raawwate jabeessee balaaleffate.

Manni Marii Amantiilee Oromoo Idil Addunyaa ajjeechaa sukkanneessaa ummata Oromoo aanaa Amuruu magaalaa Agamsaa fi naannawa isheerratti raawwate jabeessee balaaleffate. 

Lubbuu lammiilee nagaa humnoota finxaaleyyii Amaaraa fi shororkeessitoota Faannootiin darbeefis gaddee jira.

Dhimmuma kanarratti boordiin mana marii kanaa walgahii ariifachiisaa Fulbaana 03 2022 taa’een  ibsa baaseera. 

Haaluma kanaan Murni Faannoo fi Finxaaleyyii Amaaraa yakka sukkanneessaa Oromoo irratti raawwate  hatattamaa seeratti akka dhiyaatu gaafateeti jira.

Nageenyi uummata Oromoo kutaa hundatti yaaddessaa waan dhufeef qaamni dhimmi ilaallatu hunduu nageenya uummataa akka mirkaneessu, uummatni Oromoos yeroo rakkisaa kanatti gamtaan akka dhaabbatu waamicha godheeti jira. 

Sababa shororkeessitoota kanneenii uummata qe’ee fi qabeenya isaarraa buqqa’eef  eegumsi fi gargaarsi namoomaa akka godhamu kan gaafate manni marichaa, jaarmiyaaleen Oromoo biyya keessaa fi ala jiran rakkoo Oromoon keessa jiru hubatanii gargaarsa akka godhan tokkummaanis akka dhaabbatan gaafateera.

Kana malees dhaabbileen mirgoota namoomaa  fi hawaasni idil addunyaa gochaa duguuggaa sanyii Oromoo irratti raawwatamaa  jiruuf  xiyyeeffannaa kennuun gochaa hamaa kana dhaabsisuuf qooda isaanii akka bahan jechuun waamicha godha  Mana marii Amantiilee Oromoo Idil addunyaa.