Kutaalee Oromiyaa garaagaraatti rakkoo daandii waliin walqabatee haala hammaataa keessa jiraachuu jiraattonni himan. – OMN

Kutaalee Oromiyaa garaagaraatti rakkoo daandii waliin walqabatee haala hammaataa keessa jiraachuu jiraattonni himan.

Jiraattonni godinaalee Wallagga Bahaa, Wallagga Lixaa, Qeellem Wallaggaa, Harargee Lixaa, Shawaa Kibba Lixaa, Shawaa Lixaa, Jimmaa, Gujii, Booranaa fi kanneen biroo tokko tokko yaada OMNf kennaniin daandiin dhabamuu, kan jirus manca’uun rooba gannaa kanaan bakkaa bakkatti socho’uuf akka rakkatan himatu.

Godina Wallagga Bahaa Daandiin Naqamtee, Angar Guutee, Gidda Ayyaanaa, Limmuu Galiilaa, Haroo Limmuu, Eebantuu, Kiiramuu geessu baduu isaatiin rakkoo guddaa keessa jiraachuu jiraattonni komatu.

Daandiin manca’uu isaatiin roobni gannaa itti dabalamee sochii geejibaaf rakkisaa ta’uu himaniiti jiru.

Haaluma walfakkaatuun godina Harargee Lixaattis daandiin Bookee fi Odaa Bultum walqunnamsiisu garmalee baduu isaa jiraattonni himu.

Jiraattonni akka jedhanitti, daandiin bona dhukkee ganna dhoqqee ta’uun rakkoo hammaataa keessa jiru.

Godina Shawaa Kibba Lixaa fi Shawaa Lixaatti immoo hojiin daandii Asfaaltii Amboo-Walisoo waggaa dheeraa dura jalqabame xumuramuu dhabuu isaatiin deebi’ee badaa jiraachuu jiraattonni himaniiru.

Pirezidaantiin naannoo Oromiyaa obbo Shimallis Abdiisaa irra deebiin jalqabsiisanis hin hojjatamne jedhu jiraattonni.

Godina Shawaa Lixaattis daandiin Gindabarat Shukutee hojjatamuu dhabuun geejibaaf rakkisaa ta’uu jiraattonni komataniiti jiru.

Godina Booranaatti immoo daandiin Mooyalee gara aanaa Guchii geessu riqicha dhabuu isaatiin balaaf saaxilamaaa jirraa jedhu jiraattonni.

Godina Gujiittis daandiin kiilomeetira 130 fagaatu Diillaa, Bulee Horaa, Waachuu, Shaakkisoo walqunnamsiisu haala hammaataa keessa jiraachuu jiraattonni komatu.

Godina Jimmaattis daandiin Cooraa Botor Limmuu geessu akkasumas daandiin aanaa Nadhii Gibee fi aanaa Noonnoo Beenjaatti magaalaa Algaa fi Beenjaa walqunnamsiisu manca’ee haala hammaataa keessa jiraachuu jiraattonni himaniru.

Godina Jimmaa aanaa Sigimootti immoo uummanni ganda No’oo fi naannawaa sanaa laga guddaa riqicha hin qabne irra haala yaaddessaan cehaa jiraatu dubbatu.

Daandiin godina Wallagga Lixaa magaalaa Gimbii fi Najjoo walqunnamsiisus haala geejibaaf hin taane irra jiraachuu OMN odeeffate.

Godina Arsiitti daandiin Kofalee Qorees rakkoo hammaataa jiraattootatti ta’uu himaniiti jiru.

Godina Bunnoo Beddelleetti daandiin aanaa Daboo Haannaa magaalota sadii walqunnamsiisu manca’ee rakkoof saaxilamuu jiraattonni himaniiru.

Lixa Oromiyaatti daandiin aanaalee sadii jechuunis Sadii Caanqaa, Jimmaa Horroo fi Gidaamii walqunnamsiisus manca’uu isaatiin bakkaa bakkatti socho’uun ulfaataa akka ta’e jiraattotatu OMNtti hime.