Handhuura Oromiyaa Magaalaa Finfinnee Manneen Barnootaa keessatti Alaabaan mootummaa naannoo Oromiyaa akka hin fannifamne fi faaruun naannichaas akka hin faarfamne caasaan magaalaatti Faannoon gurmeesse rakkoo uumaa jiraachuu qaamoleen garagaraa ibsan.

Handhuura Oromiyaa Magaalaa Finfinnee Manneen Barnootaa keessatti Alaabaan mootummaa naannoo Oromiyaa akka hin fannifamne fi faaruun naannichaas akka hin faarfamne caasaan magaalaatti Faannoon gurmeesse rakkoo uumaa jiraachuu qaamoleen garagaraa ibsan.

Bulchiinsi Magaalaa Finfinnee Afaan Oromootiin barsiisuun waggaa shan dura kan jalqabee fi gaafii ummanni Oromoo yeroo dheeraaf gaafataa tureedha jedhee jira.

Handhuurri siyaas-dinagdee fi hawaasummaa Itoophiyaa akkuma Oromiyaa ta’e, hunduurri Oromiyaa Finfinneen Oromiyaaf fiixxee fi Galma qabsoo ummata Oromooti.

Oromoon mirga abbaa biyyummaa Finfinnee irratti qabu deebisuuf qabsoo hadhaa’aa taasisaa jira.

Ummanni Oroomoo ilaalcha Oromummaa magaalaa Finfinneetti dagaagsuu fi Finfinnee irratti abbaa qabeenyummaa qabu mirkaneessuuf qabsoo yoo adeemsisu, Faannoo dabalatee gareewwan finxaaleyyii Amaaraa mirga Oromoon magaalaa Finfinnee irraa qabu ukkaamsuuf tattaaffii cimaa taasisaa jiru.

Haaluma kanaan mirga Oromoon afaan isaatiin daa’immaan isaa magaalaa Finfinnee keessatti barsiifachuu qabu ugguruuf gareewwan kun hookkara kaasuutti jiru.

Humnoonni mirga Oromoon magaalaa Finfinnee irraa qabu ugguruun, hokkoraa fi jeequmsa manneen barnootaa magaalaa Finfinnee keessatti kaasaan caasaan isaanii caasaa mootummaa irraa jalqabee hamma manneen barnootaatti kan diriire ta’uutu dubbatama.

Caasaan Faannoon magaalaa Finfinnee keessatti gareewwan finxaaleyyii Amaaraa biroo waliin ta’uun ijaarrate waajjiraalee mootummaa hanga manneen barnootaatti diriiruun mirga ummanni Oromoo daa’imman isaa afaan isaatiin barsiisuuf qabu ukkaamsuuf hojjataa jira.

Caasaan garee kanaa mana maree magaalaa Finfinnee hanga paarlaamaa Itoophiyaatti duriiree jirus hojii isaa hojjataa jira.

Yaa’ii Manni Maree Magaalaa Finfinnee tibba darbe taasisan irratti miseensi mana maree magaalattii fi qondaalli Biltsiginnaa doktar Sisaay Mangistee “Manneen barnootaa magaalaa Finfinnee keessatti  alaabaan Oromiyaa akkamiin fannifama?, faaruun naannichaas maaliif faarfama?” jechuun gaafatan

Miseensi Paarlaamaa Itoophiyaa Kiristaan Taaddalaa yaada barreesseen  hokkora gareen Faannoon gurmeessee fi finxaaleyyiin Amaaraa biroon manneen barnootaa Magaalaa Finfinnee keessatti kaasan wayita deeggaran mul’atan.

Kantiibaan bulchiinsa Magaalaa Finfinnee aadde Adaanech Abeebee marii tibbana jiraattoota magaalatti waliin taasisan booda yaada fuula barruu (Facebook) irratti barreessaniin, magaalatti keessatti afaan Oromootiin barsiisuun waggaa shan dura bara bulchiinsa ADWUI kan eegale ta’uu ibsanii, dhimmi kun akka waan har’a eegalee fi faaruu naannoo tokkoo dirqamaan akka waan barattoota irratti fe’ameetti qaamonni dhiyeessan burjaajji uumuufi jedhan.

Itti aanaan hoogganaa Komunikeeshiinii Magaalaa Finfinnee obbo Salamoon Dibaabaa qaamoleen manneen barnootaa kanneen keessatti hokkora uumaa jiran warreen araara kaaba Itoophiyatti bu’etti hin gammanneedha jechuun gareen kun Finfinnee keessatti hokkora uumaa kan jiraniif salphatti xiyyeefannaa hawaasa addunyaa argatuufi jedhan.

Itti dabaluun kan jedhan obbo Salamoon manneen barnootaa magaalaa Finfinnee keessatti mormiin alaabaa fi faaruu alaabaa Oromiyaatin wal qabatu gaaffii jiraattota Finfinnee akka hin taane adda baafachuu himan.

“Kuni gaaffii barattootaa, gaaffii barsiisotaa, gaaffii maatii barattootaa ykn gaaffii jiraattota magaalaa Finfinnee akka hin taane adda baafanneerra. Barattoota fi maatii barattootaa wajjin mari’achuun hundi keenya waliigallee turre jedhan.

Gareen Faannoo caasaa magaalaa jedhee ijaaree fi gareewqan finxaaleyyii Amaaraa biroon manneen barnootaa keessatti erga jeequmsa uumanii booda, Alaabaa lummuxii qabachuun alaabaan biyyatti kana jechuun yeroo mirmirsan ni mul’atu.

Gorsaan Sab-qunnamtii Kantiibaa Bulchiinsa Magaalaa Finfinnee obbo Alamaayyoo Ijjiguu yaada EBCf kennaniin gareen kun erga mana barnootaa keessatti jeequmsa kaasee booda alatti alaabaa faallaa alaabaa Itoophiyaa mirmirsuun alaabaan kana jedhaa ture jedhan.

Manneen barnootaa magaalaa Finfinnee keessatti argaman 557 keessaa manneen barnootaa 403 keessatti Afaan Oromootiin barsiifamaa fi Afaan Oromoo barsiifamaa jiraachutu himama.

Akka heera mootummaa naannoo Oromiyaatti manneen barnootaa Afaan Oromoo barsiisan keessatti alaabaa Oromiyaa fannisuufi faaruun alaabaa faarfachuun dirqama akka ta’e obbo Salamoon Dibaabaa ni dubbatu.

Namoota hokkora kana uuman 72 ol qabamuu Waajjirri Bulchiinsaa fi Nageenyaa Magaalaa Finfinnee Muddee 12 bara 2022 ibsa baaseen himee jira.

Kutaaleen hawaasaa garagaraa magaalattii dadhabinna mootummaatiin qaamoleen hokkora uuman sirna baruu fi barsiisuu gufachiisaa akkasuma daa’imman Oromoo irratti miidhaa dhaqqabsiisaa jiru jechuun mootummaa komatu.