Godina Wallagga Bahaa aanaa Giddaa Ayyaanaa ganda Guddinaa Calliyaatti Obbolaan lama waraana mootummaa Biltsiginnaa ajjeefaman. – OMN

Godina Wallagga Bahaa aanaa Giddaa Ayyaanaa ganda Guddinaa Calliyaatti Obbolaan lama waraana mootummaa Biltsiginnaa ajjeefaman.

Odeeffannoon jiraattota aanichaarraa nuqaqqabe akka mul’isutti, Obbolaan lameen waraanni mootummaa gara jabinaan ajjeese dargaggoo Mootii Dhaabaa fi Lammii Dhaabaa jedhamani.

Mootiin Barsiisaa wayita ta’u, Lammiin ammoo Barataa dhiheenya Yunivarsitii Riftivaalii irraa eebbifamuun boqonnaaf gara maatii isaatiitti deebi’e ta’uu ibsan maddeen Odeeffannoo keenya.

Waraanni mootummaa badii tokko malee halkan mana maatii isaaniitti itti marsee buluun, kaleessa gara barii bakka isaan ciisanitti ol itti seenee rasaasa itti roobsuun ajjeesuu OMN’f himaniiru.

Obbolaa lameen irratti ajjeechaa suukanneessaa kana erga raawwataniin boodas Haadhaa fi Abbaa isaanii qabanii akka hidhan, hanga oduun kun qindaa’ettis hidhaa akka jiran odeeffanneerra.

Dargaggoonni kun sababuma Oromummaa isaanii ajjeefaman malee yakki raawwatan tokkollee hin turre kan jedhan jiraattonni naannoo, murni aangoorra jiru ilmaan Oromoo diinomfachuun duguuggaan guyyaa guyyaan raawwatu dhaabbachuu qaba jedhu.

Yakkoonni waraanaa hidhattoota mootummaan bobbaasuun dhalattoota Oromoo irratti raawwataman yeroodhaa gara yerootti hammaataa dhufuun, ajjeechaa, hidhaa fi dararaan darbees qe’ee fi qabeenya hawaasaa saamuu fi barbadeessuun taatee guyyuu golee Oromiyaa maraa dhagahamu ta’eera.