Bataskaana Ortodoksii Tawaahidootti kutaan lallaba Jimmaa murtii sinoodoosiin miilana dabarse morme. – OMN

Bataskaana Ortodoksii Tawaahidootti kutaan lallaba Jimmaa murtii sinoodoosiin miilana dabarse morme.

Kutaan lallaba Jimmaa ibsa baaseen, amantoonni yaa’ii sinoodoosii tibba kanaa abdiin eegaa turan jedhe.

Haata’uutii garuu sinoodoosiin yaa’ii tibbana geggeessaa ture keessatti gaaffii uummataaf deebii malu deebisuu caalaa fedhii abboota muraasaatiin dantaa uummata keenyaa sharafee kan jiruu fi shira hamaa ta’e kan mul’isu ta’uusaa hubanneerra jedhe.

Murteen kun waliigaltee abboota keenya sadanii jechuunis Abuna Saawuroos, Abuna Zeenaa Maarqos fi Abuna Awusxaatiyoos (PhD) tiin alatti murtaa’uun isaa immoo ammas olaantummaan garee tokkoo sinoodoosiicha keessatti kan duraa caalaa akka dagaage kan ibsu waan ta’eef uummata keenya daraan kan dallansiiseedha jedhe kutaan lallabichaa.

Qabxilee araaraa bakka Ministirti muummee Abiy Ahimed argamanitti waliigalame keessaa keewwatoota 4 fi 6 gutummaan guututti kan diige waan ta’eef ammas mana kiristiyaanaa naannoo oromiyaa keessatti rakkoo uumuuf kan yaadame akka ta’e hubanneerra jedha ibsichi.

Murtichi fudhatama akka hin qabne eeree, abbaa sinoodoosiin Oromiyaa fi sabootaa ramadaniin ala akka hin fudhanne ibseeti jira.

Amantii daheeffachuun warreen siyaasa adeemsisan cimsee akka mormu kutaan lallaba Jimmaa himee, abboonni 26 kana dura muudaman muudamni isaanii ragga’uu akka qabu hubachiiseera.